Davlatimiz rahbari tomonidan 2017 yil noyabr oyida qabul qilingan qarorga muvofiq, o‘sib kelayotgan yosh avlodni harbiy-vatanparvarlik ruhida tarbiyalash, ularda ona Vatanga sadoqat va uning mustaqilligini himoya qilish bo‘yicha burch tuyg‘usini shakllantirish, harbiy xizmatga hurmat tuyg‘ularini singdirish, shuningdek, oliy harbiy taʼlim muassasalariga o‘qishga kirish uchun yetarli bilimga ega bo‘lgan iqtidorli yoshlarni tizimli ravishda tayyorlash maqsadida, Vazirlar Mahkamasining 2020 yilda “Umumiy o‘rta taʼlim maktablarida harbiy-vatanparvarlik sinflari faoliyatini tashkil etish chora-tadbirlari to‘g‘risida”gi Qarori qabul qilingan.
Unga ko‘ra 2020-2021 o‘quv yilidan boshlab yuqorida taʼkidlaganimizdek Qoraqolpog‘iston Respublikasi, Toshkent shahri va barcha viloyatlarda 4 tadan jami respublikamiz bo‘ylab 56 ta maktablarda harbiy-vatanparvarlik sinflari tashkil etilib Milliy gvardiyaga biriktirilgan.
Ushbu sinflarda o‘qish muddati besh yil bo‘lib, 6 sinfni bitirgan o‘quvchilar qabul qilinadi va 7-11 sinflarda taxsil olishadi.
Maktablarda tashkil qilingan qabul komissiyalari tomonidan mazkur sinflarga kirish istagini bildirgan nomzodlardan tegishli hujjatlar 1 iyuldan 20 iyul kuniga qadar qabul qilinib, 25 avgust kunigacha belgilangan tartibda jismoniy tayyorgarlik va tegishli fanlar yo‘nalishi bo‘yicha test sinovlari o‘tkaziladi.
Harbiy-vatanparvarlik sinflariga qabul qilish bo‘yicha tanlov teng huquqlilik va qabul qilishning yagona qoidalari asosida amalga oshiriladi.
Tanlovning yakuniy natijalari 25 avgust kuni eʼlon qilinadi.
