O‘zbekistonda jang san’atlari va o‘zini-o‘zi himoya qilish tizimini rivojlantirishning yangi bosqichiga qadam qo‘yildi: joriy yilning 24 may kuni Milliy gvardiya homiyligidagi "Pekiti tirsia kali" federatsiyasi Adliya vazirligi tomonidan davlat ro‘yxatidan o‘tkazilib, 20306-sonli guvohnoma taqdim etildi.
"Pekiti tirsia kali" haqida asosiy ma’lumotlar:
"Pekiti tirsia kali" — Filippinning an’anaviy jang san’ati bo‘lib, u sovuq qurollar, tayoqlar va qurolsiz jang elementlarini, shuningdek kurash va qo‘l jangi usullarini o‘zida mujassam etadi. Ushbu tizim raqibni zararsizlantirish va qurolsizlantirishning samarali usuli sifatida e’tirof etilgan bo‘lib, minimal zarar yetkazgan holda amalga oshiriladi va Yevropa hamda AQShning harbiy va huquqni muhofaza qilish tuzilmalarida, jumladan maxsus bo‘linmalarda keng qo‘llaniladi.
Bir asrdan ortiq tarixga ega bo‘lgan ushbu jang san’ati 2025 yilda o‘zining 128 yilligini nishonlamoqda. Unga Grand Tuhon Leo Tortal Gaje Jr. rahbarlik qiladi. 2003-yilda u AQSh, Kanada, Yevropa va Filippinda vakillari mavjud bo‘lgan Pekiti tirsia Global xalqaro tashkilotiga asos solgan. Filippinda ushbu federatsiyaga ikkinchi Maginoo-Mandala Rommel Tortal rahbarlik qiladi.
Mamlakatimizda mazkur Federatsiyaning tashkil etilishi kuch tuzilmalari harbiy xizmatchi va xodimlarining jismoniy va taktik tayyorgarligini takomillashtirib borishda, shuningdek o‘zini-o‘zi himoya qilish usullarini puxta egallash istagida bo‘lgan fuqarolar uchun ham muhim ahamiyat kasb etadi. Uning faoliyat yo‘nalishlaridan biri yosh yigit-qizlarga o‘zini-o‘zi himoya qilish va favqulodda vaziyatlarda himoyalanish usullarini o‘rgatishdan iborat.
O‘zbekistonda rivojlanish:
Federatsiyaning davlat ro‘yxatidan o‘tkazilishi mamlakatda ushbu jang san’atining rivojlanishga huquqiy asos va mantiqiy qadam bo‘ldi. 2023 yil fevral oyida Rommel Tortalning O‘zbekistonga birinchi tashrifi bo‘lib o‘tib, ikki hafta davomida Filippin Xalqaro federatsiyasi rahbari tomonidan Milliy gvardiya harbiy xizmatchilari bilan o‘tkazilgan mashg‘ulotlar mobaynida ularning jismoniy va sport tayyorgarlik darajasi yuqori baholandi. Shuningdek, tizim rahbariyati va shaxsiy tarkibining "Pekiti tirsia kali"ni o‘rganish niyatlari jiddiyligiga ishonch hosil qilgan Rommel Tortal jang san’atining ushbu turini rivojlantirish va ommalashtirish bo‘yicha uzoq muddatli rejalarni tinglab, Milliy gvardiyaga "Pekiti tirsia kali" maktabini ochish uchun rasmiy ruxsatnoma berishga qaror qildi va unga O‘zbekistonda “PTK Bantay” ("Jangchi") sport klubi nomini berdi. O‘sha yilning o‘zida 29 mart kuni esa Milliy gvardiyaning Ixtisoslashtirilgan o‘quv markazi negizida Markaziy Osiyo mintaqasidagi birinchi va yagona "Pekiti tirsia kali" maktabi o‘z faoliyatini boshladi. Bu yerda kuch tuzilmalari harbiy xizmatchilari va huquqni muhofaza qiluvchi organlari xodimlari tayyorgarlikdan o‘tishdi.
Bu esa "Pekiti tirsia kali" ni milliy taktik tayyorgarlik va o‘zini o‘zi himoya qilish tizimiga yanada tadbiq etish uchun mustahkam poydevor bo‘ldi.
Alohida ta’kidlash joizki, dastlabki bosqichda Milliy gvardiya harbiy xizmatchilarini o‘qitishda, Belarus Ichki ishlar vazirining oʻrinbosari — ichki qoʻshinlar qoʻmondoni general-mayor N. Karpenkov tashabbusi bilan «PTK Batikan» sport klubi rahbari Eduard Shvidchenko boshchiligidagi instruktorlar yaqindan yordam ko‘rsatib, mashg‘ulotlar olib borishdi.
Federatsiyaning asosiy maqsad va vazifalari:
- Kuch tuzilmalari va huquqni muhofaza qiluvchi organlar orasida "Pekiti tirsia kali" ni amaliy jang san’ati sifatida ommalashtirish va rivojlantirish;
- Kuch tuzilmalari va huquqni muhofaza qiluvchi idoralarda malakali instruktorlarni tayyorlash;
- O‘zbekiston Respublikasi Milliy gvardiyasi maxsus bo‘linmalari hamda Markaziy Osiyo mintaqasidagi boshqa mamlakatlar harbiy xizmatchilari ishtirokida musobaqalar va treninglar tashkil etish.
Hozirda Federatsiyaning rasmiy veb-saytini yaratish va tashkiliy masalalar yuzasidan ishlar olib borilmoqda. Amalga oshirilgan ishlar borasida alohida ma’lumotlar berib boramiz.
