Ўзбекистонда жанг санъатлари ва ўзини-ўзи ҳимоя қилиш тизимини ривожлантиришнинг янги босқичига қадам қўйилди: жорий йилнинг 24 май куни Миллий гвардия ҳомийлигидаги "Pekiti tirsia kali" федерацияси Адлия вазирлиги томонидан давлат рўйхатидан ўтказилиб, 20306-сонли гувоҳнома тақдим этилди.
"Pekiti tirsia kali" ҳақида асосий маълумотлар:
"Pekiti tirsia kali" — Филиппиннинг анъанавий жанг санъати бўлиб, у совуқ қуроллар, таёқлар ва қуролсиз жанг элементларини, шунингдек кураш ва қўл жанги усулларини ўзида мужассам этади. Ушбу тизим рақибни зарарсизлантириш ва қуролсизлантиришнинг самарали усули сифатида эътироф этилган бўлиб, минимал зарар етказган ҳолда амалга оширилади ва Европа ҳамда АҚШнинг ҳарбий ва ҳуқуқни муҳофаза қилиш тузилмаларида, жумладан махсус бўлинмаларда кенг қўлланилади.
Бир асрдан ортиқ тарихга эга бўлган ушбу жанг санъати 2025 йилда ўзининг 128 йиллигини нишонламоқда. Унга Grand Tuhon Leo Tortal Gaje Jr. раҳбарлик қилади. 2003 йилда у АҚШ, Канада, Европа ва Филиппинда вакиллари мавжуд бўлган Pekiti tirsia Глобал халқаро ташкилотига асос солган. Филиппинда ушбу федерацияга иккинчи Maginoo-Mandala Rommel Tortal раҳбарлик қилади.
Мамлакатимизда мазкур Федерациянинг ташкил этилиши куч тузилмалари ҳарбий хизматчи ва ходимларининг жисмоний ва тактик тайёргарлигини такомиллаштириб боришда, шунингдек ўзини-ўзи ҳимоя қилиш усулларини пухта эгаллаш истагида бўлган фуқаролар учун ҳам муҳим аҳамият касб этади. Унинг фаолият йўналишларидан бири ёш йигит-қизларга ўзини-ўзи ҳимоя қилиш ва фавқулодда вазиятларда ҳимояланиш усулларини ўргатишдан иборат.
Ўзбекистонда ривожланиш:
Федерациянинг давлат рўйхатидан ўтказилиши мамлакатда ушбу жанг санъатининг ривожланишга ҳуқуқий асос ва мантиқий қадам бўлди. 2023 йил феврал ойида Роммел Торталнинг Ўзбекистонга биринчи ташрифи бўлиб ўтиб, икки ҳафта давомида Филиппин Халқаро федерацияси раҳбари томонидан Миллий гвардия ҳарбий хизматчилари билан ўтказилган машғулотлар мобайнида уларнинг жисмоний ва спорт тайёргарлик даражаси юқори баҳоланди. Шунингдек, тизим раҳбарияти ва шахсий таркибининг "Pekiti tirsia kali"ни ўрганиш ниятлари жиддийлигига ишонч ҳосил қилган Rommel Tortal жанг санъатининг ушбу турини ривожлантириш ва оммалаштириш бўйича узоқ муддатли режаларни тинглаб, Миллий гвардияга "Pekiti tirsia kali" мактабини очиш учун расмий рухсатнома беришга қарор қилди ва унга Ўзбекистонда “PTK Бантай” ("Жангчи") спорт клуби номини берди. Ўша йилнинг ўзида 29 март куни эса Миллий гвардиянинг Ихтисослаштирилган ўқув маркази негизида Марказий Осиё минтақасидаги биринчи ва ягона "Pekiti tirsia kali" мактаби ўз фаолиятини бошлади. Бу ерда куч тузилмалари ҳарбий хизматчилари ва ҳуқуқни муҳофаза қилувчи органлари ходимлари тайёргарликдан ўтишди.
Бу эса "Pekiti tirsia kali" ни миллий тактик тайёргарлик ва ўзини ўзи ҳимоя қилиш тизимига янада тадбиқ этиш учун мустаҳкам пойдевор бўлди.
Алоҳида таъкидлаш жоизки, дастлабки босқичда Миллий гвардия ҳарбий хизматчиларини ўқитишда, Беларус Ички ишлар вазирининг ўринбосари — Ички қўшинлар қўмондони генерал-майор Н. Карпенков ташаббуси билан «PTK Батикан» спорт клуби раҳбари Эдуард Швидченко бошчилигидаги инструкторлар яқиндан ёрдам кўрсатиб, машғулотлар олиб боришди.
Федерациянинг асосий мақсад ва вазифалари:
- Куч тузилмалари ва ҳуқуқни муҳофаза қилувчи органлар орасида "Pekiti tirsia kali" ни амалий жанг санъати сифатида оммалаштириш ва ривожлантириш;
- Куч тузилмалари ва ҳуқуқни муҳофаза қилувчи идораларда малакали инструкторларни тайёрлаш;
- Ўзбекистон Республикаси Миллий гвардияси махсус бўлинмалари ҳамда Марказий Осиё минтақасидаги бошқа мамлакатлар ҳарбий хизматчилари иштирокида мусобақалар ва тренинглар ташкил этиш.
Ҳозирда Федерациянинг расмий веб-сайтини яратиш ва ташкилий масалалар юзасидан ишлар олиб борилмоқда. Амалга оширилган ишлар борасида алоҳида маълумотлар бериб борамиз.
