Ўзбекистон Республикаси Миллий гвардияси байроғи
(Ўзбекистон Республикаси Президентининг 2018 йил 19 июлдаги Фармонига мувофиқ тасдиқланган)
Ўзбекистон Республикаси Миллий гвардияси байроғи (кейинги ўринларда – байроқ деб аталади) Ўзбекистон Республикаси Миллий гвардиясига хос бўлган хусусиятларини ифодаловчи идоравий расмий рамз ҳисобланиб, бутун узунлиги бўйлаб байроқни тенг иккига ажралган – тўқ қизил ва оқ рангли бўлаклардан таркиб топган, тўғри тўртбурчак шаклидаги матодир. Тўқ қизил ранг – куч ва мардликни, оқ ранг – оқилоналик, олижаноблик, поклик, ошкоралик, самимийлик, ишонч ва ҳаққонийликни ифодалайди. Тўқ қизил ва оқ ранглар гаммаси миллат фаровонлиги учун хизматни англатади.
Байроқнинг олд ва орқа томони ўртасида Ўзбекистон Республикаси Миллий гвардиясининг расмий эмблемаси (тимсоли) тасвирланган. Байроқ тепасида «O‘ZBEKISTON RESPUBLIKASI», пастида «MILLIY GVARDIYASI» деган сўзлар горизонтал шаклда битилган. Сўзлардаги ёзув ҳарфларнинг бўйи – 6,5 сантиметрни, эни – 4,5 сантиметрни, ҳарфлар орасидаги масофа 1,5 сантиметрни ташкил этади. Байроқдаги ҳарфлар – четдан марказга қараб жойлашган, тўқ қизил фондаги бўлакда оқ рангда ва оқ фондаги бўлакда тўқ қизил рангда ёзилган.
Байроқнинг узунлиги – 250 сантиметрга, кенглиги – 125 сантиметрга тенг. Байроқ ҳар бир бўлаги –125 сантиметрга тенгдир. Байроқ бошқа ҳажмда ҳам бўлиши мумкин, бунда байроқ узунлиги ва кенглиги иккидан – бир узунликка мувофиқ, байроқ ичидаги тимсол учдан – бир узунликка мувофиқ бўлиши лозим.
Ўзбекистон Республикаси Миллий гвардияси эмблемаси
(Ўзбекистон Республикаси Президентининг 2018 йил 19 июлдаги Фармонига мувофиқ тасдиқланган)
Ўзбекистон Республикаси Миллий гвардияси эмблемаси (кейинги ўринларда – эмблема) бутун айлана бўйлаб ўтган доирани тенг иккига бўлувчи, тўқ қизил ва оқ рангли бўлаклардан иборат доира бўлиб, доира чеккаси тўқ қизил рангли чизиқли айлана билан ўралган.
Эмблема доирасини ўраб турган айлана чизиқлар тепасига – лотин алифбосида тилларанг катта ҳарфлар билан «O‘ZBEKISTON RESPUBLIKASI», пастида – «MILLIY GVARDIYASI» деган сўзлар ўтган. Ёзувларни айлананинг ҳар икки томондан мамлакатимизда тинчлик ва осойишталикни сақлаш каби Ўзбекистон Республикаси Миллий гвардиясининг вазифаларини тасвирловчи оливия ўсимлиги шоҳлари ажратиб турибди.
Доиранинг тепасида тилларанг катта ҳарфлар билан лотин алифбосидаги «MILLAT MANFAATLARI HIMOYASIDA» номли шиор битилган.
Доиранинг марказида куч-қудрат, мардлик ва адолатлилик рамзи ҳисобланган – шер ҳайвонининг сурати, шер белида ёруғлик, донишмандлик ва мустаҳкамликни, давлатни турли таҳдид ва хавфлардан ҳимоя қилишни ифодаловчи – қуёшни кўтариб турибди.
Шер суратининг тепасида Ўзбекистон Республикаси Миллий гвардияси қўриқлайдиган давлат ва миллат манфаатларини ифодаловчи Ўзбекистон Республикаси давлат байроғининг ҳилпираб турган сурати туширилган.
Ўзбекистон Республикаси Миллий гвардияси эмблемаси кўпрангли ва биррангли нусхада фойдаланилиши мумкин.
Ўзбекистон Республикасининг Давлат байроғининг ҳилпираган фони остида, белидан қуёшни кўтариб турган шер суратидан (кичик эмблема) сифатида мустақил равишда фойдаланишга рухсат этилади.
