Milliy gvardiya tizimlarida muddatli harbiy xizmat o‘tash uchun chaqirtirilgan yurtimiz o‘g‘lonlari "Vatanga qasamyod" qabul qilishdi. Shu munosabat bilan respublikamiz bo‘ylab barcha harbiy qism va bo‘linmalarda yosh askarlar va ularning yaqinlari ishtirokidagi tantanali marosimlar bo‘lib o‘tdi
“Vatanga Qasamyod” yurtimiz tinchligi va osoyishtaligini himoya qilishdek muqaddas burchni ado etishga bel bog‘lagan har bir yurtimiz mard o‘g‘lonlarining tantanali vaʼdasi, shuningdek Vatan himoyasi yo‘lidagi masʼuliyatli va sharafli vazifani o‘zida mujassam etgan huquqiy hujjat bo‘lib, Qurolli Kuchlar safiga kirgan yosh harbiy xizmatchining hayotidagi unutilmas kun va tantanali vaʼdasi hisoblanadi.
Shu kunlarda Respublikamiz bo‘ylab Milliy gvardiya harbiy qism va muassasalariga 2024 yilda yangi chaqirilgan muddatli harbiy xizmatchilarni Vatanga qasamyod qabul qilish marosimlariga bag‘ishlangan tantanali tadbirlar o‘tkazilmoqda. Xususan, Qoraqalpog‘iston Respublikasi va viloyatlarda bo‘lib o‘tgan tadbirlarda yosh askarlar qasamyodda bitilgan muqaddas so‘zlarni tilga olib, O‘zbekiston xalqiga va Prezidentiga sadoqatli bo‘lishga, O‘zbekiston Respublikasi Konstitutsiyasi talablarini so‘zsiz va vijdonan bajarishga, xalq va davlat manfaatlarini himoya qilishga tantanali ravishda vaʼda berdilar. Tadbirda har bir yosh muddatli harbiy xizmatchilarga Prezident sovg‘asi, kitoblar jamlanmasi tantanali ravishda topshirildi.
Toshkent shahrida joylashgan harbiy qismda bo‘lib o‘tgan tantanali tadbirda Milliy gvardiya qo‘mondoni R.Djurayev, O‘zbekiston Respublikasi Oliy Majlisi Qonunchilik palatasining Mudofaa va xavfsizlik masalalari qo‘mitasi aʼzolari T.Karimov va F.Ashmatovlar, Bosh prokuror o‘rinbosari – Harbiy prokuror B.Kudratxodjayev, hamkor vazirlik mutasaddi rahbarlari va faxriylar, shuningdek yosh askarlarning yaqin qarindoshlari ishtirok etishdi.
Milliy gvardiya qo‘mondoni Vatanga qasamyod qabul qilgan barcha yosh askarlarni hamda ularning tadbirda ishtirok etayotgan yaqinlarini samimiy muborakbod etdi.
Shuningdek, Muhtaram Prezidentimiz Qurolli Kuchlarimiz Oliy Bosh Qo‘mondoni Shavkat Miromonovich Mirziyoyev so‘zlari bilan aytganda “Milliy armiyamiz va xalqimizning faol hamkorligi tufayli Qurolli Kuchlarimiz - mamlakatimiz taraqqiyoti, tinchligi va barqarorligining ishonchli kafolatiga, chinakam jasorat va matonat maktabiga aylanmoqda, deb aytishga barcha asoslarimiz bor”.
Milliy gvardiya bo‘linmalarida muddatli harbiy xizmat o‘tash uchun kirishayotgan yosh o‘g‘lonlar bir yil qisqa vaqt bo‘lsada, har bir daqiqadan unumli foydalangan holda komandirlar tomonidan beriladigan harbiy bilim va ko‘nikmalarni mustahkam egallab Davlatimiz rahbari tomonidan Milliy gvardiyaga bildirilgan ishonch va uning oldiga qo‘yilgan vazifalarni sidqidildan bajarib, “Burch, Sadoqat, Jasorat” shioriga munosib xizmat qilishlariga ishonch bildirildi.
Tantanali tadbirda so‘zga chiqqanlar xalqimiz tinchiligi va osoyishtaligini, jamoat tartibi va xavfsizligini saqlashdek sharafli va masʼuliyatli vazifaga otlanayotgan o‘g‘lonlarimizga omad tiladi. Joylarda bo‘lib o‘tgan yosh askarlarning harbiy qasamyod qabul qilish marosimlariga jamoatchilik vakillari, ota-onalar, o‘quvchi yoshlar tashrif buyurishdi.
Eʼtiborlisi shundaki bir oy davomida harbiy xizmatga ko‘nikma hosil qila olgan yosh askarlarning qurol bilan taktik harakatlarni amalga oshirishni, “qo‘l jangi” usullarini, “Faxriy qorovul” saf elementlarini o‘zida mujassam etgan ko‘rgazmali chiqishlari barchani birdek hayratda qoldirdi desak mubolag‘a bo‘lmaydi. O‘z farzandlarining yigitlik burchini ado etishga kirishganini ko‘rgan ota-onalar qalblari faxr iftixorga to‘ldi.
Marosim so‘ngida harbiy orkestr ijrosidagi musiqali va Milliy gvardiya ansambli sanʼatkorlarining vatanni madh etuvchi kuy qo‘shiqlari havola etilib barchaga birdek bayramona kayfiyat ulashdi.
