O‘zbekiston Respublikasi Qurolli Kuchlari tashkil etilganligining 33 yilligi hamda Vatan himoyachilari kuni munosabati bilan, Milliy gvardiya qo‘mondonining bayram tabrigi
Hurmatli hamkasblar!
Milliy gvardiya harbiy xizmatchi va xodimlarini, taʼlim muassasalari professor-o‘qituvchilarini, kursant va o‘quvchilarini, soha faxriylarini, ishchi-xizmatchilarni hamda xizmat burchini bajarish chog‘ida halok bo‘lgan gvardiyachilarimizning oila aʼzolarini “O‘zbekiston Respublikasi Qurolli Kuchlari tashkil etilganligining 33 yilligi hamda Vatan himoyachilari kuni” bayrami bilan samimiy tabriklayman!
Muhtaram Prezidentimiz, Qurolli Kuchlar Oliy Bosh Qo‘mondoni Shavkat Miromonovich Mirziyoyev “Xalqimizning xavfsizligi, tinchligi va osoyishtaligini saqlash bugun ham, kelajakda ham eng ustuvor vazifamiz bo‘lib qoladi”- deb biz harbiylarni eʼtirof etganlar.
Zero, bu yilgi “Vatan himoyachilari kuni” bayrami “Yangi O‘zbekiston armiyasi – mamlakat tayanchi, xalqimiz faxri!” shiori ostida ko‘tarinki ruxda nishonlanmoqda.
Darhaqiqat, Yangi O‘zbekistonimizda amalga oshirilayotgan islohotlar natijasida Milliy gvardiya inson huquqlari va manfaatlarining chinakam himoyachisi, jamiyat va davlat xavfsizligining ishonchli posboni sifatida chin maʼnoda xalqimiz faxriga aylandi.
Milliy gvardiyada bo‘linmalarning jangovar va maxsus tayyorgarligiga, tizimli ravishda zamonaviy qurol-aslaha va anjomlar, ilg‘or harbiy texnikalar bilan taʼminlab borilishiga alohida eʼtibor qaratilmoqda.
Fidoyi gvardiyachilarimiz Davlatimiz rahbari tomonidan qo‘yilgan vazifalarini bajarishda bor kuch-g‘ayratini safarbar etib, mamlakatimizda o‘tkazilgan nufuzli siyosiy tadbirlar, davlat bayramlarida xavfsizlikni taʼminlash, jamoat tartibini saqlash, ishonchli qo‘riqlovni taʼminlash, yoshlarni harbiy vatanparvarlik ruxida tarbiyalash, ular orasida sportni yana-da ommalashtirish kabi ishlarda faol qatnashib, oliyjanob Xalqimiz ishonchini qozonmoqdalar.
Albatta, bunday sharafli xizmatimizda bizni qo‘llab quvvatlab turgan aziz ota-onalarimiz, oila aʼzolarimizning o‘rni beqiyos.
Hurmatli safdoshlar!
Milliy gvardiya shaxsiy tarkibining kamtarona mehnatlari Davlatimiz rahbari tomonidan eʼtirof etilib, kuni kecha 9 nafar gvardiyachilar “Do‘stlik” ordeni, “Jasorat”, “Sog‘lom turmush”, “Sodiq xizmatlari uchun”, “Shuhrat” medallari bilan taqdirlandilar.
Bunday yutuqlar Muxtaram Prezidentimizning Milliy gvardiyaga bildirgan yuksak ishonchlaridan dalolat bo‘lib, bizlarni o‘z xizmat burchimizga yana-da sadoqatli bo‘lishga chorlaydi.
Biz bundan keyin ham bo‘linmalarning jangovar shayligini yuqori darajada ushlab turish, jamoat tartibini saqlash, jismoniy va yuridik shaxslarni mol-mulkini ishonchli qo‘riqlash, yuksak salohiyatli harbiy kadrlarni tayyorlash hamda yoshlarni harbiy vatanparvarlik ruhida tarbiyalash borasidagi ishlarimizni jadallashtirishimiz.
Shuni ishonch bilan ayta olamanki, Sizlar, doimo harbiy burchga va qasamyodga sodiq qolgan holda Yangi O‘zbekistonimizni va Xalqimizni har qanday tahdidlardan ishonchli va mardonavor himoya qilasiz.
Sizlarni va oila aʼzolaringizni yana bir bor Qurolli Kuchlari tashkil etilganligining 33 yilligi va Vatan himoyachilari kuni bayrami bilan samimiy tabriklayman!
Barchangizga mustahkam sog‘liq, oilangizga tinchlik-totuvlik, Vatanni himoya qilishdek sharafli xizmatingizda kuch-quvvat va zafarlar tilayman!
Hurmat bilan!
Milliy gvardiya qo‘mondoni
general mayor R.M.Djurayev
