O‘zbekiston Respublikasi Jamoat xavfsizligi universiteti 1-bosqich kursantlarini Vatanga qasamyod, “Temurbeklar maktabi” va harbiy-musiqa akademik litsey o‘quvchilarining tantanali vaʼdasiga bag‘ishlangan marosim bo‘lib o‘tdi
Tantanali tadbirda O‘zbekiston Respublikasi Milliy gvardiyasi qo‘mondoni general-mayor R.Djurayev, O‘zbekiston Respublikasi Oliy Majlis Qonunchilik palatasi Mudofaa va xavfsizlik masalalari qo‘mitasi aʼzosi T.Choriyev O‘zbekiston Respublikasi harbiy prokurori adliya polkovnigi B.Qudratxo‘jayev, O‘zbekiston Respublikasi Xavfsizlik kengashi kotibiyati xodimi D.Djalalov, faxriylar, ota-onalar, ommaviy axborot vositalari va boshqa mutasaddi rahbarlar ishtirok etishdi.
Mazkur tadbirni ahamiyatlisi shuki “Vatanga qasamyod”, tantanali vaʼda berish marosimida ilk bor bitta saf maydonida Milliy gvardiya taʼlim tizimining barcha vakillari ishtirok etmoqda.
Tantanali marosim, Milliy gvardiya qo‘mondoni general-mayor R.Djurayevga Jamoat xavfsizligi universiteti boshlig‘ining tadbirga tayyorligi to‘g‘risidagi axboroti bilan boshlanib, shaxsiy tarkib qasamyod va tanatanali vaʼda berishga keltirildi.
Yoshlarimiz o‘z ota-onalari va yaqinlari guvohligida qilgan Vatanga qasamyodi va tantanali vaʼdalari yuksak faxr va g‘urur ramzi ekanligini xis qilgan holda taʼlim muassasalarida o‘quvchi, kursant va magistrant sifatida davom ettirib yetuk kadr bo‘lib shakllanishlari uchun qadam qo‘yishdi.
Milliy gvardiya qo‘mondoni yoshlarni Vatanga qasamyod va tantanali vaʼda berganligi bilan tabriklar ekan, ularga “Hech qachon unutmang, g‘alaba va baxt – astoydil intilganniki! Yangi O‘zbekiston, butun xalqimiz va Prezidentimiz Sizdek mard, jasur va bilimli yoshlariga ishonadi! Siz yoshlar ham, bildirilgan yuksak ishonchni oqlab, mamlakatimiz tinchligi va osoyishtaligi yo‘lida Vatanga qasamyodingiz hamda Milliy gvardiyaning “Burch, Sadoqat, Jasorat” shioriga sodiq qolgan holda O‘zbekiston Respublikasi xalqiga va Prezidentiga sadoqat bilan xizmat qilasizlar!” deya ishonch bildirdi.
Shuningdek, marosimda ishtirok etayotgan barcha mehmonlarga, avvalo farzandini Vatan himoyasi yo‘lida xizmat qilishga shay etib tarbiyalagan ota-onalarga, ularning maktabdagi ustozlariga minnatdorchilik bildirildi.
O‘z navbatida, so‘zga chiqqan O‘zbekiston Respublikasi Oliy Majlis Qonunchilik palatasi Mudofaa va xavfsizlik masalalari qo‘mitasi aʼzosi ham ko‘zlarida olov chaqnab turgan o‘g‘il-qizlarni Vatanga qasamyodi hamda tantanali vaʼdasi bilan qutlab, Yangi O‘zbekistonning ertangi istiqboli yosh avlod qo‘lida ekanligini yodga olgan holda safda turgan yoshlar zimmalaridagi burch hamda masʼuliyatni munosib oqlashlari uchun, Vatanimiz ravnaqi va farovonligi uchun sidqidildan bilim olishlari zarurligini taʼkidlashdi.
Ota-onalar nomidan so‘z olganlar esa davlatimiz tomonidan yoshlar taʼlim-tarbiyasi, ularning kelajak maqsadi va istiqboli yo‘lida yaratib berilayotgan ulkan imkoniyatlarni eʼtirof etishib yurtboshimizga o‘z minnatdorchiligini bildirishdi.
Marosimning badiiy qismida O‘zbekiston Respublikasi Milliy gvardiyasi harbiy musiqa akademik-litseyi o‘quvchilarining “Zarbli cholg‘ular ansambli”, harbiy orkestr jamoasi, kursantlar tomonidan Bobur obrazining sahnalashtirilganligi, shuningdek harbiy xizmatchilarning ko‘rgazmali chiqishlari namoyish etildi.
