Milliy gvardiya tizimlarida muddatli harbiy xizmatni oʻtashga bel bogʻlagan yosh askarlar Vatanga qasamyod qilishdi. Shu munosabat bilan respublikamiz boʻylab tantanali marosimlar boʻlib oʻtdi.
“Vatanga qasamyod” yurtimiz tinchligi va osoyishtaligini himoya qilishdek muqaddas burchni ado etishga bel bogʻlagan har bir yurtimiz mard oʻgʻlonlarining tantanali vaʼdasi, shuningdek Vatan himoyasi yoʻlidagi masʼuliyatli va sharafli vazifani oʻzida mujassam etgan huquqiy hujjat boʻlib, Qurolli Kuchlar safiga kirgan yosh harbiy xizmatchining hayotidagi unutilmas kun va tantanali vaʼdasi hisoblanadi.
Shu kunlarda Respublikamiz boʻylab Milliy gvardiya harbiy qism va muassasalariga 2025 yilda chaqirilgan yosh askarlarni Vatanga qasamyod qilish marosimlariga bagʻishlangan tantanali tadbirlar boʻlib oʻtmoqda.
Xususan, Toshkent shahri, Qoraqalpogʻiston Respublikasi va barcha viloyatlarda boʻlib oʻtgan tadbirlarda yosh askarlar qasamyodda bitilgan muqaddas soʻzlarni tilga olib, Oʻzbekiston xalqiga va Prezidentiga sadoqatli boʻlishga, Oʻzbekiston Respublikasi Konstitutsiyasi talablarini soʻzsiz va vijdonan bajarishga, xalq va davlat manfaatlarini himoya qilishga tantanali ravishda vaʼda berdilar. Tadbirda ishtirok etgan har bir yosh askarga Prezident sovgʻasi, kitoblar jamlanmasi tantanali ravishda topshirildi.
Toshkent shahrida boʻlib oʻtgan shu kabi tantanali tadbirda Oʻzbekiston Respublikasi Milliy gvardiyasi qoʻmondoni general-mayor R.Djurayev, Oliy Majlis Qonunchilik palatasi deputati – Mudofaa va xavfsizlik masalalari qoʻmitasi aʼzosi K.Tojiyev, Oʻzbekiston Respublikasi Prezidenti huzuridagi Xavfsizlik Kengashi vakili D.Djalalov, Nuroniy jamgʻarmasi Respublika boshqaruvi raisi oʻrinbosari SH.Usmonov, Oʻzbeksiton Respublikasi Harbiy prokurori v.v.b polkovnik O.Xolboyev, Respublika Harbiy sudi raisi S.Eshankulov, Oʻzbekistonda xizmat koʻrsatgan artist T.Saidov, harbiy xizmatchilar va faxriylar, jamoatchilik vakillari, ota-onalar hamda oʻquvchi yoshlar ishtirok etishdi.
Tadbirda Milliy gvardiya qoʻmondoni, Vatanga qasamyod qilgan barcha yosh askarlarni hamda ularning yaqinlarini samimiy muborakbod etdi.
Shuningdek, tantanali tadbirda soʻzga chiqqanlar, yurtimiz tinchiligi va xalqimiz osoyishtaligini taʼminlashdek sharafli va masʼuliyatli vazifalarni oʻzining eng oliy burchi deb bilgan mard oʻgʻlonlarimizga katta ishonch bildirib, muddatli harbiy xizmat davomida ularga omad va ulkan zafarlar tilashdi.
Harbiy xizmatda koʻnikma hosil qilgan yosh askarlar tomonidan qisqa vaqt davomida oʻzlashtirilgan qurol bilan saf tayyorgarligi va qoʻl jangi usullaridan koʻrgazmali chiqishlar hamda Faxriy qorovul boʻlinmasining saf chiqishlari namoyish etildi. Bir oyda farzandlaridagi oʻzgarishlarni koʻrgan ota-onalarning qalbida gʻurur, faxr va iftixor tuygʻulari joʻsh urdi.
Tadbirning badiiy qismida harbiy orkestr ijrosidagi musiqali chiqishlar va Milliy gvardiya ansambli sanʼatkorlarining Vatanni madh etuvchi kuy-qoʻshiqlari ishtirokchilarga koʻtarinki kayfiyat ulashdi.
