Bola tabassumi – olam bezagi. Ayniqsa, “Xalqaro bolalarni himoya qilish kuni”da yurtimiz ularning samimiy va beg‘ubor kulgusi bilan yana-da yasharib ketadi. Chunki hech bir o‘g‘il-qiz mehrdan, eʼtibordan chetda emas. Ushbu bayram arafasida Chirchiq shahridagi 14-sonli Mehribonlik uyining eshiklari yopilib, ko‘pchilik yoshlarning mustaqil hayotga qadam qo‘yishi tantanali nishonlandi.
Xabaringiz bor, bugunga qadar respublikamizda 22 ta Mehribonlik muassasalarining faoliyati tugatilgan. 800 nafarga yaqin qora ko‘zlar bugun 140 ta Oilaviy bolalar uylarida to‘la-to‘kis kamolga yetmoqda. Shuningdek, Mehribonlik uylari bitiruvchilarining 211 nafari oliy va o‘rta-maxsus taʼlim muassasalarida tahsil olishmoqda. Yoshlar bilan ishlashning yangicha tizimi doirasida Davlatimiz rahbari tomonidan belgilab berilgan vazifalar ijrosi amalda izchillik bilan tadbiq etilyapti. Toshkent viloyati Chirchiq shahridagi Mehribonlik uyining 30 nafar o‘g‘il-qizlari so‘nggi qo‘ng‘iroq sadolari ostida maktabni tugatib yangi hayotga qadam qo‘ymoqda.
Bituvchilar umumtaʼlim maktabida ustoz va tarbiyachilaridan bilim va ko‘nikmalarni egallashdi, endi yurtboshimiz tomonidan yaratib berilayotgan imkoniyat va sharoitlardan foydalangan holda, poytaxtimizdagi o‘rta-maxsus va oliy taʼlim muassasalarida o‘qishni davom ettirishadi. Ularning ko‘pchiligi harbiy taʼlim muassasalarini tanlagan. Bu esa ularda Vatanparvarlik tuyg‘ulari yuqori ekanligidan dalolat.
14-sonli Mehribonlik uyida bolalar soni keskin kamaygani hisobga olinib, muassasa optimallashtirilgan holda qolgan 30 dan ortiq tarbiyalanuvchilar Toshkent shahridagi 150 sig‘imga ega bo‘lgan 22-sonli Mehribonlik uyiga joylashtirildi. Shu bilan birga, 48 nafar ishchi – xizmatchilarning bandligini taʼminlash choralari ko‘rilgan. Ushbu bino esa kelgusida Maktabgacha va maktab taʼlimi vazirligi rejasiga asosan Ilmiy-tadqiqot markazi sifatida foydalanishi ko‘zda tutilgan.
Shu munosabat bilan 1 iyun - Xalqaro bolalarni himoya qilish kuni arafasida Toshkent viloyati Chirchiq shahridagi 14-sonli Mehribonlik uyi ham tugatildi. Bu esa respublika bo‘ylab faoliyati tugatilgan yigirma uchinchi muassasa hisoblanadi.
-Biz 22-sonli Mehribonlik uyidagi tengdoshlarimiz bilan hamma tadbirlarda birga ishtirok etib, do‘stlashib olganmiz. Faqat bir-birimizdan uzoqda edik. Mana endi yanayam yaqin bo‘ldik va bundan judayam xursandmiz deydi 14-sonli Mehribonlik uyi tarbiyalanuvchisi bo‘lgan 13 yoshli Ozodaxon.
-Albatta, endi birga maktabga boramiz, dars tayyorlaymiz, yaqinda oromgohga ketamiz deya xursandchiligini bildirdi 22-sonli Mehribonlik uyi tarbiyalanuvchisi 13 yoshli Robiya.
22-sonli Mehribonlik uyida bayram munosabati bilan madaniy tadbirlar o‘tkazildi, tarbiyalanuvchilardan xabar olinib, turli sovg‘alar ulashildi. Yoz mavsumida ularni so‘lim oromgohlar kutmoqda. Bolajonlar ushbu maskanlarda maroqli hordiq chiqaradilar, egallagan bilimlarini turli to‘garaklarda yana-da mustahkamlab qaytishadi.
