Миллий гвардия сафларида муддатли ҳарбий хизматни ўтаб бўлган аскарларни тантанали кузатиш маросими бўлиб ўтди
Миллий гвардия сафларида бир йил мобайнида йигитлик бурчини ўтаб бўлган муддатли ҳарбий хизматчилар тантанали равишда ўз яшаш манзилларига кузатиб қўйилди.
Миллий гвардия ҳарбий қисмларида хизмат олиб борган муддатли ҳарбий хизматчилар жамоат тартибини сақлаш ва фуқаролар хавфсизлигини таъминлаш борасида хизмат ўташ билан бирга жисмоний тарбия, жанговар ва маънавий – маърифий тайёргарлик машғулотлари бўйича билим олишиб, ҳарбий-ватанпарварлик руҳида тарбияландилар. Миллий гвардия марказий девони ва ҳарбий қисмларида ўтказилган тадбирларда муддатли ҳарбий хизматни намунали ўтаган 350 нафар ҳарбий хизматчиларнинг ота-оналарига Миллий гвардия қўмондонлиги номидан ташаккурномалар ва тест синовларидан муваффақиятли ўтган 1350 нафар аскарларга Ўзбекистон Республикаси олий таълим муассасаларига ўқишга киришлари учун тавсияномалар топширилди. Бундан ташқари 750 нафарига эса ота оналарига миннатдорчилик хати тақдим этилди.
Шунингдек, Миллий гвардия тизимида кадрлар тайёрлаш ҳамда резервини яратиш мақсадида ўтказилган касбий саралашда муваффақиятли иштирок этган муддатли ҳарбий хизматчилар контракт бўйича ҳарбий хизматга ва қўриқлаш хизматига ходим сифатида қабул қилинадиган бўлди. Шунингдек, муддатли ҳарбий хизматни тамомлаб ўз ҳудудларига қайтган йигитларнинг бандлигини таъминлаш мақсадида ҳам манзилли ишлар олиб борилади. Улар мактабларда қоровуллик лавозимларига қабул қилинишади.
Миллий гвардия сафларида хизматни ўтаб қайтаётган ҳар томонлама етук, жисмонан соғлом бўлган муддатли ҳарбий хизматчилар ўз ҳудудларига борганда албатта, илғор соҳаларнинг муҳим вакиллари бўлишади. Тошкент жанубий темир йўл вокзалида хизматдошлари билан хайрлашган аскарлар ҳарбий оркестр садолари остида тантанали равишда ўз вилоятларига кузатиб қўйилди.
