Ўзбекистон Республикаси Жамоат хавфсизлиги университети 1-босқич курсантларининг Ватанга қасамёд ва Миллий гвардия хизматига кириш қасамёдига бағишланган тантанали маросим бўлиб ўтди.
Ўзбекистон Республикаси Жамоат хавфсизлиги университети биринчи босқич курсантларининг Ватанга қасамёди ҳамда Ўзбекистон Республикаси Миллий гвардияси хизматига кириш қасамёдига бағишланган тантанали маросим бўлиб ўтди.
Маросимда Ўзбекистон Республикаси Миллий гвардияси қўмондони, Ўзбекистон Республикаси Олий Мажлиси Қонунчилик палатаси депутатлари, куч тузилмалари таълим муассасаларининг раҳбарлари, таниқли давлат ва жамоат арбоблари, курсантларнинг оила аъзолари ҳамда меҳрибонлик уйлари тарбияланувчилари иштирок этди.
Саф майдонига тантанали марш садолари остида Давлат ҳамда Миллий гвардия жанговар байроқлари тантанали равишда олиб кирилди.
Маросим аввалида сўзга чиққан университет бошлиғи, полковник М. Рустамбаев қасамёд – ҳар бир ватан ҳимоячиси учун муқаддас эканлиги, қасамёдга содиқлик – ҳақиқий ватанпарварларга хос муҳим хусусият саналишини эътироф этди.
Шундан сўнг, курсантлар ҳар бир ватан ҳимоячиси учун муқаддас саналган, эндиликда улар ҳам ўз зиммасига олаётган масъулиятли ва шарафли бўлган бурчни ҳар қандай вазиятда адо этишга тантанали қасамёд қабул қилди.
Қасамёддан сўнг, Миллий гвардия қўмондони, генерал-майор Р.Джураев курсантларни Миллий гвардия сафига қабул қилинганлиги билан табриклади.
Шундан сўнг тадбир қатнашчиларига Заҳириддин Муҳаммад Бобур образининг от устида ўз навкарлари билан бадиий чиқишлари, Университет курсантларидан иборат гуруҳлар "Саф" тайёргарлиги ва "Қўл жанги" бўйича кўргазмали чиқишлар намойиш этилди. Шунингдек, тадбирда Ўзбекистон Республикаси Миллий гвардиясининг алоҳида ҳарбий намунали- кўргазмали оркестрининг чиқишлар намойиш этилди.
Жамоат хавфсизлиги университетига ўқишга қабул қилинган 1-босқич курсантларининг қасамёдига бағишланган тантанали маросимдан сўнг, таниқли санъаткорлар ва Университет бадиий ҳаваскорлик ансамбли иштирокида байрам концерти намойиш этилди.
