КЕЛИШУВЛАРНИ АМАЛГА ОШИРИШДА ХАЛҚАРО ҲАМКОРЛИК РЕЖАЛАРИ
Ўзбекистон Республикаси Миллий гвардияси ва Халқаро қизил Хоч қўмитасининг (ХҚХҚ) Марказий Осиёдаги минтақавий ваколатхонаси ўртасида 2023 йилга мўлжалланган икки томонлама ҳамкорлик режаси доирасида жорий йилнинг 23-24 март кунлари “Ҳуқуқ-тартибот фаолиятининг халқаро стандартлари” мавзусида семинар бўлиб ўтди.
Мазкур семинарда делегация раҳбари ўринбосари Ж.Барбарис, ХҚХҚнинг ҳуқуқни муҳофаза қилиш органлари билан ишлаш бўйича вакили К. Макдоналд, ҳуқуқни муҳофаза қилиш органлари билан ишлаш дастури маслаҳатчиси Т.Тиналиев ва Миллий гвардия ҳарбий хизматчилари иштирок этди.
Машғулотлар давомида ҳуқуқни муҳофаза қилиш соҳасидаги халқаро стандартлар, халқаро ҳуқуқ, шу билан бир қаторда, турли шароитларда куч ва ўқотар қуроллардан фойдаланиш усуллари муҳокама қилинди.
Иштирокчилар томонидан замонавий воқелик шароитида, шунингдек, низоли вазиятларда ҳуқуқни муҳофаза қилиш органлари фаолияти юзасидаги масалалар кўриб чиқилди.
Тадбир якунида иштирокчилар халқаро сертификатларга эга бўлишди.
Ўзбекистон Республикаси Миллий гвардияси Халқаро ҳамкорлик бошқармаси
