Milliy gvardiya tizimida muddatli harbiy xizmatni o‘tab bo‘lgan askarlarni uylariga kuzatish marosimi bo‘lib o‘tdi.
Milliy gvardiya Markaziy devoni hamda hududiy bo‘linmalarida muddatli harbiy xizmatni o‘tab qaytayotgan muddatli harbiy xizmatchilarga O‘zbekiston Respublikasi oliy taʼlim muassasalariga o‘qishga kirishlari uchun tavsiyanomalar va namunali xizmat qilgan askarlarning ota-onalariga tashakkurnomalar topshirish tadbiri bo‘lib o‘tdi.
Poytaxtimizda bo‘lib o‘tgan tadbirda Milliy gvardiya qo‘mondoni o‘rinbosari polkovnik S.Mamayusupov ishtirok etib, muddatli harbiy xizmatchilarning kelgusi faoliyatida muvaffaqiyat tiladi. Bu kabi tadbirlar respublikaning barcha hududlaridagi Milliy gvardiya harbiy qismlarida o‘tkazildi.
Shu o‘rinda taʼkidlashimiz kerakki, Milliy gvardiya tizimida xizmat olib borgan muddatli harbiy xizmatchilar jamoat tartibini saqlash va xavfsizlikni taʼminlash borasida xizmat o‘tash bilan birga, jangovar va maʼnaviy – maʼrifiy tayyorgarlik mashg‘ulotlari bo‘yicha bilim olishib, harbiy-vatanparvarlik ruhida tarbiyalandilar.
Muddatli harbiy xizmatni namunali o‘tagan 390 nafar harbiy xizmatchilarning ota-onalariga Milliy gvardiya qo‘mondonligi nomidan tashakkurnomalar yuborildi.
Shuningdek, harbiy qismlarda jamoat tartibini saqlashga jalb etilgan muddatli harbiy xizmatchilarning jamoat tartibini saqlash va fuqarolar hayotini saqlab qolish kabi fidoyi xizmatlari qo‘mondon tomonidan eʼtirof etilib, esdalik qo‘l soati bilan rag‘batlantirildi.
Xizmatni namunali o‘tab, test sinovlaridan muvaffaqiyatli o‘tgan 1396 nafar muddatli harbiy xizmatchiga O‘zbekiston Respublikasi oliy taʼlim muassasalariga o‘qishga kirishlari uchun tavsiyanomalar berildi.
Milliy gvardiya tizimida kadrlar tayyorlash masalasi hamda kadrlar rezervini yaratish maqsadida kontrakt bo‘yicha harbiy xizmatga va qo‘riqlash xizmatiga xodim sifatida 2282 nafar muddatli harbiy xizmatchilar harbiy-kasbiy saralashdan o‘tkazilib, 1483 nafari sinovlardan muvaffaqiyatli o‘tdilar.
Hozirgi kunda 150 nafarga yaqin muddatli harbiy xizmatchilarni kelgusida Milliy gvardiya tizimida kontrakt asosida xizmat o‘tash uchun olib qolishni rejalashtirilgan.
Milliy gvardiya tizimida xizmatni o‘tab uylariga qaytarilayotgan 3150 ga yaqin muddatli harbiy xizmatchilar ham kelgusida fuqarolik jamiyatida o‘z o‘rnini topib, davlatimiz ravnaqi va taraqqiyoti uchun o‘z hisclarini qo‘shadilar.
Milliy gvardiya tizimida xizmatni o‘tab qaytgan barcha muddatli harbiy xizmatchilar doimo eʼtibor markazida bo‘ladi hamda ularni kelgusida o‘qish va ishga joylashtirish bo‘yicha yordamlar amalga oshiriladi. Ular Toshkent temir yo‘l vokzalida xizmatdoshlari bilan xayrlashib, viloyatlariga jo‘nab ketishdi.
