Ўз O'z Ру En

ХОТИН-ҚИЗЛАР ФАОЛЛИГИ — ЖАМИЯТ РИВОЖИНИНГ МУҲИМ ОМИЛИ

Ўзбекистон Республикаси Маҳалла ва оилани қўллаб-қувватлаш вазирлиги ҳузуридаги Навоий вилоят Хотин-қизлар тадбиркорлик маркази ҳамда Миллий гвардия Навоий вилояти бўйича бошқармаси ўртасида ҳамкорлик меморандуми имзоланди.
Маълумки, мазкур ҳужжат хотин-қизларни қўллаб-қувватлаш, жамиятнинг барча соҳаларида фаоллигини ошириш, уларни кичик бизнес ва хусусий тадбиркорликка кенг жалб этиш, тадбиркорлик ташаббусларини янада қўллаб-қувватлаш, замонавий касб-ҳунар, рақамли иқтисодиёт кўникмаларини пухта эгаллашлари учун қўшимча шарт-шароитлар яратиш, иш билан таъминлаш жараёнларига кўмаклашиш юзасидан ўзаро ҳамкорликни белгилаб беради.
Томонлар ушбу Меморандумга мувофиқ ўз ваколатлари доирасида ҳамда ўз Низомларида белгиланган мақсад ва вазифаларни амалга ошириш мақсадида тадбиркорлик билан шуғулланиш истагини билдирган ҳарбий хизматчи (ходим)ларнинг оила аъзоларини ўқув марказларга жалб этиш ва тадбиркорлик фаолиятини ташкил этишга кўмаклашишга келишиб олдилар. Норматив-ҳуқуқий ҳужжат ҳарбий хизматчи (ходим)ларни оила аъзоларини (турмуш ўртоғи, вояга етган фарзандлари) ўз бизнесини ташкил этиш ва юритиш кўникмаларини шакллантириш, бизнес ғояларини тайёрлашда консультатив ёрдам бериш, лойиҳа бизнес-режасини тайёрлаш, замонавий ахборот технологияларидан фойдаланиш ва бошқа йўналишлар бўйича ўқитиш ташкил этишни ҳам кўзда тутди.
Бундан ташқари, ёш тадбиркор хотин-қизларга ва тадбиркорлик билан шуғулланиш истагини билдирган ҳарбий хизматчи (ходим)ларни оила аъзоларини ўз бизнесини ташкил этишда зарур маслаҳатлар бериш ва амалий ёрдам кўрсатиш ҳам эътибордан четда қолмади.
Шубҳасиз, ушбу саъй-ҳаракатлар ҳарбий хизматчилар ва уларнинг оила аъзоларини ижтимоий қўллаб қувватлаш, уларга ҳар томонлама кўмак бериш, хизматни юқори савияда ташкил этишга хизмат қилади.

Белгиланган матнни тинглаш учун қуйидаги тугмани босинг Powered by GSpeech