Farg‘ona viloyatida Navro‘z ayyomi munosabati bilan uloq- ko‘pkari musobaqalari o‘tkazildi
Uloq, ko‘pkari – O‘rta Osiyo xalqlarining qadimiy ommaviy, milliy o‘yinlaridan biri hisoblanadi. Asosan, g‘alaba va hosil bayramlari, to‘y va sayllar munosabati bilan o‘tkaziladi.
Bugun, Farg‘ona viloyati Milliy gvardiya "Chavandozlar maktabi" da Navro‘z umumxalq bayrami arafasida Namangan, Andijon, Farg‘ona viloyatlaridan tashrif buyurgan mohir chavandozlar o‘rtasida uloq-ko‘pkari musobaqasi bo‘lib o‘tdi.
Qizg‘in va murosasiz bahslarga boy bo‘lgan musobaqada mohir chavandozlar bor imkoniyatlarini ishga solgan holda, g‘alaba uchun kurashdilar.
Eʼtirof etish joizki, mazkur tadbirga viloyatlarning turli hududlaridan tashrif buyurgan 200 ga yaqin chavandozlar, shuningdek, tadbirni tomosha qilish uchun 1000 dan ziyod ot sporti ishqibozlari, yoshlar, mahalliy aholi vakillari hamda sport ixlosmandlari yig‘ildi.
Musobaqa davomida, Milliy gvardiya “Qo‘riqlash”boshqarmasi tomonidan kamondan otish sport musobaqalari, ot ustida kurash singari milliy o‘yinlar tashkil etildi.
Bellashuv yakuniga ko‘ra g‘oliblikni qo‘lga kiritgan ishtirokchilar tashkilotchilar tomonidan sovrinlar va esdalik sovg‘alari bilan taqdirlandi.
