Янгиликлар

Ўзбекистон Республикаси куч тузилмалари ва ҳуқуқни муҳофаза қилувчи органлари мутахассис-кинологларининг билим ва кўникмаларини ошириш, уларнинг касбий маҳоратини баҳолаш, республика ва халқаро мусобақаларда иштирок этиш, кинологларни танлаш, амалий тажриба орттириш, мазкур соҳада юқори натижаларга эришиш мақсадида жорий йилнинг 26-май куни Миллий гвардия Жамоат хавфсизлиги университети ҳудудида илк маротаба Идоралараро мутахассис-кинологлар ўртасида “Хизмат итлари кўргазмаси” мусобақаси бўлиб ўтди.
Мазкур мусобақани Қозоғистон ва Қирғизистон Республикаларидан ташриф буюрган Халқаро Полиция Ассоциацияси вакиллари катта таассуротлар билан кузатиб боришди.
Унда Миллий гвардия, Давлат хавфсизлиги хизмати, Ички ишлар вазирлиги, Давлат Божхона қўмитаси, Фавқулодда вазиятлар вазирлиги мутахассис кинологлари ўзларига бириктирилган хизмат итлари билан иштирок этишди.
Мусобақа жараёнларида мутахассис-кинологларнинг жисмоний тайёргарлиги ва касбий маҳоратларига, шунингдек энг яхши кинологлар ҳамда экстремал вазиятларда лозим вазифаларни бажариш каби номинациялар бўйича хизмат итларини тайёргарлик даражаси баҳолаб борилди.
Қизиқарли шартлардан иборат беллашувлар жараёнларини Қозоғистон Республикасидан ташриф буюрган халқаро тоифадаги ҳакам Нина Макелова ҳакамлигида натижалар аниқланди. Унда иштирокчилар белгиланган қоидаларга кўра, иштирокчилар “Умумий дрессировка курси машқлар” (ўтир, тур, ёнимга, ёнимда, жойингда каби имо-ишора ва овозли буйруқлар бериш), “Ёрдамчига тегишли буюмнинг ҳиди бўйича уни танлаш” (машқни бажаришда ҳидла, изла буйруқлари) ва “Ёрдамчининг буюмини унга тегишли бўлган буюмнинг ҳиди бўйича танлаш” машқлари бўйича вазифаларни юқори аниқликда бажаришга ҳаракат қилишди.
Шунингдек, мутахассис-кинологлар махсус белгиланган майдонда 50 дан ортиқ 3 ойликдан 8 ёшгача бўлган Немис, Шарқий-европа, Ўрта Осиё ва Белгия (малинуа) овчаркалари ҳамда Лабрадор зотларига мансуб хизмат итларининг кўргазмасида зотдорлик даражаси бўйича беллашишди. Бир нечта шартларни ўз ичига олган ушбу мусобақа барча иштирокчилар учун ўзаро билим, малака ва тажриба алмашиш имконини берди.
Мусобақанинг якуний натижаларига кўра:
Буюмларни танлаб топиш йўналишида - Миллий гвардия жамоаси 1-ўринни, Фавқулодда вазиятлар вазирлиги жамоаси 2-ўринни, Миллий гвардия Қўриқлаш хизмати жамоаси эса 3-ўринни эгаллашди.
Одамни топиш йўналиши бўйича - Фавқулодда вазиятлар вазирлиги жамоаси 1-ўринни, Миллий гвардия Қўриқлаш хизмати жамоаси 2-ўринни, Ички ишлар вазирлиги жамоаси 3-ўринни қўлга киритишди.
Умумий машқ курси ёналиши бўйича - Божхона қўмитаси жамоаси 1-ўринни, Ички ишлар вазирлиги жамоаси 2-ўринни, Миллий гвардия жамоаси 3-ўринни эгаллашди.
Кичик ва катта ёшли ит зотлари бўйича кўргазмасида Жамоат хавфсизлиги университети жамоаси 1-ўринга сазовор бўлишди.
Ғолиб жамоалар ташкилотчилар томонидан кубок, медаль, диплом ва эсдалик совғалари билан муносиб тақдирландилар.
Мазкур мусобақа Миллий гвардия, Халқаро Полиция Ассоциацияси ва Жамоат хавфсизлиги университети ҳамкорлигида ташкиллаштирилди.