Камондан отиш спорт тури бўйича халқаро мусобақада юқори натижа кўрсатиб, Париж-2024 ёзги олимпия ўйинларига йўлланмани қўлга киритган спортчилар қўмондонлик томонидан муносиб тақдирланди
Камондан отиш спорт тури бўйича жорий йилнинг 13-17 июнь кунлари Анталья шаҳрида бўлиб ўтган Якуний Жаҳон квалификацион турнирида Миллий терма жамоа аъзоси Садиков Амирхон турнирнинг барча баҳсларида рақибларини катта фарқ билан ютиб, биринчи ўринни эгаллади ва олтин медаль билан Париж-2024 ёзги олимпия ўйинларига йўлланмани қўлга киритди. Бу эса моҳир камончимиз томонидан қайт этилган тарихий натижа бўлди.
Эслатиб ўтамиз, Камондан отиш бўйича Ўзбекистон терма жамоаси аъзоси Зиёдахон Абдусатторова ҳам Таиландда ўтган Париж-2024 лицензион турнирида муваффақиятли иштирок этиб, юртимиз учун тарихда мазкур спорт турида илк Олимпиада йўлланмасини тақдим қилган эди.
Шу муносабат билан бугун Миллий гвардия қўмондони, Камондан отиш федерацияси раиси Р.Джураев мамлакатимизда спорт соҳасида амалга оширилаётган ислоҳотлар ва унинг ривожланишига муносиб ҳиссасини қўшиб, спортнинг Камондан отиш спорт тури бўйича минтақавий ва халқаро турнирларни ташкил этилишида жонбозлик кўрсатиб келаётган спортчи ва мураббийлар билан учрашуви бўлиб ўтди.
Учрашув давомида юқори натижаларни қўлга киритган моҳир мерганларимиз Садиков Амирхон, Абдусатторова Зиёда ҳамда хорижий мураббий Ким Мёнгсён, мураббийлар Савинова Ирина, Курвяков Антон, Арипова Гулнара, шу билан бир қаторда терма жамоага яқиндан психологик кўмак бериб келаётган мутахасислар Акбарова Комола, Рыбченко Ирина, Ким Юлияларга Ўзбекистон Республикаси Миллий гвардиясининг III-даражали “Намунали хизматлари учун” кўкрак нишони, қўл соатлари ва қимматбаҳо эсдалик совғалар топширилди.
Шунингдек, ушбу тадбирда Марказий девон бошқарма бошлиқлари, соҳанинг масъул ходимлари ҳамда ҳарбий хизматчи ва ходимлари ҳам иштирок этиб, тарихий натижа билан қутлашди.
Ўз навбатида сўз олган спортчи ва мураббийлар мазкур эришилаётган ютуқлар замирида давлатимиз Раҳбари томонидан қаратилаётган эътибор ҳамда Камондан отиш федерациясида сўнгги йилларда яратилган шарт-шароитлар муҳим ўрин тутаётганлигини алоҳида тилга олиб, чуқур миннатдорчилик билдиришди.
Тадбир сўнгида Камондан отиш бўйича миллий терма жамоаси аъзолари билан келгусидаги истиқболли режалар муҳокама қилиниб, Париж шаҳрида бўлиб ўтадиган Париж-2024 ёзги олимпия ўйинларига бор куч ва ғайратни сафарбар қилган ҳолда юқори натижаларни қўлга киритиб, давлатимиз мадҳиясини янграши ҳамда байроғимизни спортчилар томонидан юқорига кўтарилиши олий мақсад этиб белгиланди.
