“Ёш гвардиячи” ҳарбий-спорт мусобақасининг республика босқичи ғолиблари тақдирланди
Ўқувчи ёшларни Ватанга муҳаббат, ҳарбий бурчга садоқат руҳида тарбиялаш, улар орасида соғлом турмуш тарзини тарғиб қилиш, Миллий гвардия тизимларида хизмат қилишга қизиқтириш ва босқичма-босқич тайёрлаб бориш мақсадида Мактабгача ва мактаб таълими вазирлиги, Ёшлар ишлари агентлиги ҳамда Ёшлар иттифоқи Марказий Кенгаши билан ҳамкорликда ўтказилиб келинаётган “Ёш гвардиячи” ҳарбий-спорт мусобақасининг республика босқичи ғолиблари аниқланди.
Миллий гвардия Тошкент Темурбеклар мактабида уч кун давомида бўлиб ўтган мазкур мусобақада мамлакатимизнинг барча вилоятидан биттадан ва Сирдарё вилояти Бахт шаҳрида жойлашган Республика ўғил болалар ўқув-тарбия муассасасидан битта, жами 15 та жамоа иштирок этди. 9-11 синф ўқувчиларидан шакллантирилган жамоалар 10та шарт бўйича ўзаро рақобатлашди. Иштирокчиларни бир мақсад сари бирлаштирган ушбу ҳарбий-спорт мусобақасининг якуний натижаларига кўра ғолибларни тақдирлаш маросими Тошкент шаҳар Қўриқлаш бошқармаси Маданият саройида тантанали равишда бўлиб ўтди. Унда Миллий гвардия қўмондони генерал-майор Р. Джураев иштирок этиб, ўқувчиларни мазкур тадбирда муваффақиятли иштирок этгани билан табриклади ва биринчи ўрин ғолиби бўлган Қорақалпоғистон Республикаси Тўрткўл туманидан ташриф буюрган 18-мактаб жамоасига мукофотларни топширди. Уларнинг ҳар бири медаль, диплом, кубок, қимматбаҳо эсдалик совғалар ва электроскутер билан рағбатлантирилди.
Шунингдек, иккинчи ва учинчи ўрин соҳиблари бўлган Навоий шаҳар 1-мактаб ва Наманган вилояти Чортоқ тумани 5-мактаб жамоаларига ҳамда номинациялар бўйича ғолибларга Мактабгача ва мактаб таълим вазирлиги, Ёшлар ишлари агентлиги, Ёшлар иттифоқи Марказий Кенгаши мутасаддилари ва Республика ҳарбий прокурори томонидан совринлар ғолибларга тақдим этилди. Бундан ташқари, ютуққа эришган ҳар учала мактаб жамоасининг мураббийлари Миллий гвардия қўмондони буйруғи билан I-II-III даражали “Намунали хизматлари учун” кўкрак нишони билан тақдирланди.
Тадбир сўнгида Миллий гвардия ашула ва рақс ансамбли хушовоз хонандаларининг куй-қўшиқлари йиғилганлар эътиборига ҳавола этилди. Бўлиб ўтган “Ёш гвардиячи” ҳарбий-спорт мусобақаси нафақат беллашувлари билан, балки ўқувчилар учун ҳар куни ташкил этилган турли экскурсия ва маданий-кўнгилочар тадбирлари билан ҳам иштирокчилар ёдида сақланиб қолади.
