Миллий гвардиянинг 1215 қисқа рақамли телефон тармоғи фаолияти йўлга қўйилди
2022 йил 15 июндан Миллий гвардиянинг ҳудудий бошқармалари навбатчилик қисмларида "1215" қисқа рақамли телефони тармоғи фаолияти ташкил этилди.
Миллий гвардия қўмондонининг буйруғида белгиланганидек:
– “қисқа рақамли телефон” орқали – фуқароларнинг, шунингдек Миллий гвардия бўлинмалари шахсий таркиби ва уларнинг оила аъзоларининг қўнғироқлари қабул қилинади, рўйхатга олинади ва ҳар куни соат 09:00га қадар биринчи раҳбарга кўриб чиқиш учун киритилади;
– ҳудудий бошқармалар бошлиқлари ўз ваколати доирасида қисқа рақамли телефон орқали тушаётган қўнғироқлар масаласини қонунчилик ҳужжатларида белгиланган тартибда кўриб чиқилишини ва ҳал этилишини таъминлайдилар.
“Қисқа рақамли телефон” – фуқароларнинг Миллий гвардия тизимига хабари ва маълумотини оғзаки шаклда реал вақт режимида қабул қилиш учун мўлжалланган телефон алоқасининг (кўп каналли) махсус линияси ҳисобланади. Фуқароларнинг Миллий гвардия органларидан амалий ёрдам кўрсатишни сўраши, бузилган ҳуқуқларини ҳимоя қилишни талаб қилиши, тизим фаолиятига оид тавсиялар бериши ҳамда воқеа (ҳодисалар) ҳақида хабар бериши мўлжалланган.
Жиноятлар ва маъмурий ҳуқуқбузарликлар ҳақида хабарлар – жиноят ва маъмурий жавобгарлик тўғрисидаги қонун ҳужжатларида белгиланган ҳуқуқбузарликнинг содир бўлгани (содир этилиши) ҳақида маълумотлардан иборат бўлган, Ўзбекистон Республикаси Жиноят-процессуал кодексининг (329-моддаси) ва Ўзбекистон Республикаси Маъмурий жавобгарлик тўғрисидаги кодекс (305-306-моддалари) белгиланган тартиб ва муддатларда кўриб чиқиладиган хабар;
Аноним қўнғироқлар “қисқа рақамли телефон” орқали фамилияси, исми, отасининг исмини, яшаш жойи тўғрисидаги маълумотларни, жавоб юбориш учун почта манзилини, қайта боғланиш учун телефон рақамини маълум қилмаган, шунингдек, сўзлашув моҳияти ва мазмунини баён қилинмаган қўнғироқлар кўриб чиқилмайди.
Қўнғироқлар бутун Ўзбекистон Республикаси барча ҳудудидан 1215 ягона рақам орқали қўнғироқ қилиш йўли билан “бепул” амалга оширилади.
“Қисқа рақамли телефон” навбатчилик қисмларида 24 соат мобайнида туну–кун фаолият олиб боради.
Қўнғироқларни қабул қилиш давомийлиги – 20 дақиқадан ошмаслиги лозим, ушбу муддат тугагандан кейин қўнғироқ автоматик тарзда алоқа тармоғидан узилади.
“Қисқа рақамли телефон”га тушган қўнғироқ бўйича ҳар кун эрталаб соат 09:00 дан кечиктирмай – Миллий гвардия бўлинмалари раҳбарларига (ҳудудий бошқарма бошлиғига) ёзма ахборот берилади.
“Қисқа рақамли телефон”нинг мақсади:
Миллий гвардия тизимига қўнғироқ қилишнинг техник имкониятларини кенгайтириш ва мулоқотнинг қулай механизмини жорий этиш;
Миллий гвардия ваколатига кирадиган масалаларни ва муаммоларни тезкорлик билан ҳал этиш, шу жумладан жамоат тартибини сақлаш
ва ҳуқуқбузарликларнинг олдини олишда фойдаланиш;
фуқароларнинг Миллий гвардия бўлинмалари шахсий таркиби томонидан бузилган ҳуқуқларини тиклаш ва қонуний манфаатларини ҳимоя қилиш ҳамда қонун устуворлигини таъминлаш;
аҳоли ва тадбиркорлик субъектларининг Миллий гвардия бўлинмалари томонидан хизмат кўрсатилиши учун сарфланадиган вақти ва молиявий харажатларини камайтириш.
“Қисқа рақамли телефон” қуйидаги асосий вазифаларни бажаради:
қўнғироқ қилувчиларни Миллий гвардия фаолиятига оид очиқ ахборотлар билан таъминлаш;
фуқароларга Миллий гвардия тизимига шикоят қилиш тартиби тўғрисида маълумотлар бериш;
аҳолига ҳуқуқий маслаҳатлар ва тушунтиришлар бериб бориш.
қонунчилик ҳужжатларига зид келмайдиган ҳолатларда сўзлашувларни ёзиш ва идентификациялаш механизмларидан фойдаланиш.
Миллий гвардия Ахборот хизмати
